ntar sore di gelora bung karno senayan bakal ade pertandingan antare due musuh bebuyutan nyang ude kesohor… persija lawan persib. kedua kesebelasan ni emang ude terkenal ama pendukung nyang panatik, sebut aje the jak mania sama bobotoh the viking.
Khawatir kejadian nyang kaga dipengenin semue pihak, pulisi terpakse ambil langkah ngelarang para bobotoh the viking persib buat masuk jakarte.
emang sayang juga kalu sepakbola nyang seharusnye penuh sportifitas kudu dijelekin sama ulah pare pendukung nyang kaga bertanggung jawab, aye cuman bise bilang norak… kalu pendukung nyang baek kudu ngarti sportipitas dong… kaga sape-sape semue kudu begitu… akhirnye buat sementara ini aye dukung sriwijaya FC aje dah nyang lagi ngelaga di piala champion Asia, moge aje bise bawe name indonesia ke dunie internasional, bawe nyang baek-baek pastinye…
komik pajak
bang bero’ keliatan lage mesam-mesem sambil cecengiran didepan netbuknye nyang statusnye masi kriditan ame bang jali. emang dasar bang bero’ ude netbuknye cicilan, make internet pake wifi nyang gratisan juge,… carenye kalu mo internetan kudu nugguin bang iwan internetan juge, pasalnye dirumenye bang iwan pake ruter werles nyang kaga di kasi password, jadi kalo lagi nyale sinyalnye beleberan kemane-mane…
“ngape lu bang cecengiran kendiri…” bang idup nyamperin kagak sabar pengen tau sabab bang bero’ cecengiran ndiri..
“kagak.. ni lagi bace komik pajak, kocak aje…, perasaan kagak gitu-gitu amat dah…” kate bang bero’
“apenye….” bang idup nimpalin lagi,
” ja elah… ente baca ndiri aje dah…kaga bole bener orang seneng…” bang bero’ mulain sewot
“mari ane liat bentaran…” bang idup rade makse,
“kagak dah… kemarenan ane nyicil netbuk lu omongin dah ke tetangge…sekarang giliran lu ade maunye pengen juge make ni barang… kagak..kagak… ” kate bang bero’ sambil nulisin dikertas… http://www.pajak.go.id/dmdocuments/komik-pajak-ep1.pdf “tuh bang lu liat aje ndiri y di warnet gi dah…” bang bero’ ngeloyor….
Situ Gintung… riwayatmu kini….
ceritenye lagi nganterin bini nyang mao ngadain reunian alumni temen-temen sekelas waktu sekole sma dulu, janjian dah di kawasan wisata rekreasi Pulau Situ Gintung nyang rencanenye bakalan dijadiin tempat temen-temen bini pade kongkow-kongkow bernostalgie…
sekadar ngingetin aje, bahwe pade tanggal 27 maret taon 2009 terjadi bencane si Situ ini berupe jebolnye tanggul nyang nyebabin banyak jatoh korban jiwe, padahal tempat wisate ini bise jadi sale satu andelan wisata kote Tangerang Selatan nyang baru aje lahir.
Hampir genep setaon semenjak kejadian nyang bikin bulu kuduk kite merinding, bise diliat perobahan nyang kite bise liat secare kasat mate… bise diliat di poto inset, ntu gambar lokasi wisata nyang bekgrond nye Situ Gintung… keliatan kan.. Situ nyang aernye tenang jadi latar belakang saung-saung nyang sengaje dibikin ama pengelole…
Sementare gambar nyang belakangan baru aje dijepret nunjukin ama kite kondisi Situ nyang ude praktis kaga bebentuk Situ lagi… sekarang ini Situ ditumbuhin aneka jenis puunan, mulain dari puun pisang, rumput, semak-semak berduri… pokonye kaga ade kayak bekas-bekasnye dah kalu itu tempat dulunye berupa Situ..
Sayangnye aye ame bini kaga kesampean ngeliat lokasi tanggul nyang dulu perne jebol ntu… cuman katenye-katenye lagi dibangun lagi tanggul nyang baru nyang lebih kokoh. Situ Gintung… riwayatnye kini… tinggal cerite… ataw bakalan jadi Situ lagi…. wallahu ‘alam
bang susno bongkar MARKUS di polri…
bang Susno Duadji bikin berita heboh lagi.. hari ini 18-03 bang Susno bikin berita heboh seputar pembongkaran adanya praktek ‘markus’ di kepolisian. markus alias mafia kasus emang kudu diberantas, kerne bikin orang bise manipulasi status hukum orang, nyang sale jadi bener, nyang bener bise jadi sale…
udah dulu… ntar diterusin…
gundul palenye.. sape sangke motivator die..
sape sangke… biar kate gundul kelimis palenye… ternyate die motivator nyang udah kesohor di penjuru negeri… Namenye Imam Munadi MPI, MPI… apaan tuh.. Motivator Plontos Indonesia… jie… di jual juge plontosannye hehehe, mudah2an kaga di patenin ye…
buku nye new reborn super muslim isinye penuh motivasi dan nyang baek2 dah… katenye sih… abis aye belon dapet gratisannye hehehe
ntar kapan waktu aye bahas lagi dah, atau kalu ude kaga sabaran beli aje di warung2 nyang jualan buku nyang paling deket di kote ente… inget judulnye… NEW REBORN SUPER MUSLIM – IMAM MUNADI
kalo kaga punye banyak waktu, bise aje sih… pesen ama aye… ntar dikirim lewat abang pos, sms aje dah ye ke 021 80 737 738
chelsea..chelsea.. apes bener ente…!!!
mungkin ni hari paling jelek buat chelsea, di pertandingan nyang kedue di piale champions eropah paling nggak ade tige alesan chelsea bise dibilang apes…
pertame, maen didepan pendukungnye kendiri dikalahin sama inter milan, skornye 1-0, total jendral skornye jadi 3-1 buat inter milan…
kedue, mang drogba diganjar kartu mere… sebab alesan nyang kaga jelas.. jadi inget kasus materazi nyang juge asal itali nyang belaga ngejoprak disundul bang zidane, kalo drogba disangke nendang pemaen inter…
ketige, nyang nyakitin .. pelatih inter kaga laen dan kaga bukan ye bang mourinho nyang pernah juge ngelatih di chelsea. sekaligus chelsea jadi korban kedue mourinho, dulu waktu si bang mourinho di chelsea perne juge ngalahin porto dari portugal nyang sebelonnye juge perne dilatih…
ya ude.. ude kadung kale.. mo gimane lagi… tapi salutnye buat sikap sportip mang drogba… die ama temen-2-nye kaga ngamuk model pemaen bole di negeri kite, nyang kadang suke ngamuk kalu dapet keputusan wasit nyang kire2 kaga sesuai.
Indonesia ‘nyukur’ Malaysia di Palembang
nah… begitu dong… setele lame juge kaga ade berite nyang ngenakin dari lapangan bole, akhirnye ade juge nyang bikin kite bangge. Indonesia nyang diwakilin sriwijaya fc akhirnye sukses nyukur Malaysia nyang diwakilin selangor fa, skornye lumayan telek, setenge losin lawan atu alias 6-1
kalu sriwijaya fc bise terus menang kaya gini bukan mustahil bise maju ke babak selanjutnye di pentas piale AFC.
